«Երաժշտական աստիճաններ»

«Կերոն» զարգացման հիմնադրամը մեկնարկում է նոր՝ «Երաժշտական աստիճաններ» նախագիծը, որի նպատակն է կենդանի երաժշտությունը դարձնել քաղաքի ամենօրյա կյանքի բնական ու գեղեցիկ մասը՝ այն տեղափոխելով Երևանի հանրային, բաց և սիրելի տարածքներ։ Նախագծի շրջանակում Սարյանի աստիճանների տարածքը կլցվի կենդանի երաժշտությամբ, ջերմ ու ստեղծագործ մթնոլորտով՝ դառնալով քաղաքի բնակիչների, զբոսաշրջիկների և երաժշտասերների համար նոր մշակութային հանդիպման վայր։ Հունիսի 12-ից սկսած՝ ամեն ուրբաթ, ժամը 18:00-ին, Սարյանի աստիճանների մոտ հանդես կգան տաղանդավոր երաժիշտներ և խմբեր՝ ներկայացնելով տարբեր ժանրերի փոքր ձևաչափի կենդանի կատարումներ։ «Երաժշտական աստիճաններ» նախագիծը «Կերոն» զարգացման հիմնադրամի արդեն սիրված երաժշտական նախաձեռնությունների՝ «Երաժշտական մետրո» և «Երաժշտական օդանավակայան» նախագծերի տրամաբանական շարունակությունն է։ Եթե «Երաժշտական մետրոն» երաժշտությունը բերեց Երևանի ամենօրյա շարժման և քաղաքային ռիթմի կենտրոն, իսկ «Երաժշտական օդանավակայանը» դարձավ Հայաստան այցելուների առաջին ողջույնը, ապա «Երաժշտական աստիճաններ»-ը երաժշտությունը տեղափոխում է քաղաքի բաց մշակութային միջավայր՝ Սարյանի փողոցի գունեղ ու ակտիվ մթնոլորտ։